覺得傳統髹油同牆紙冇新意？想令家居睇落更有風格？特色牆因為選擇豐富、風格多樣，而成為香港裝修戶主近年流行嘅室內設計必備元素，為屋主配搭出理想嘅家居格調同時增加空間感，唔同嘅材質帶出嘅效果都可以好唔一樣。無論係客廳、睡房甚至走廊都可以設計特色牆。但特色牆款式眾多，邊一款先係您嘅心水？ 今日就等小編為大家講解以下6種常見嘅特色牆用料啦！
1. 水泥特色牆
水泥牆可以話係鍾意工業風格業主嘅首選，師傅以英泥再加入顏色混合嘅方法製作水泥特色牆，就好似保留大廈原初面貌，營造出一種原始質感。水泥牆一般只有灰色，除咗營造工業風家居可使用外，就算柔和風格嘅家居亦可以揀水泥特色牆。現時為咗更容易做到相近效果，市面上亦出現咗各種替代水泥但有水泥效果嘅塗料，例如水泥板/磚或藝術漆等。
2. 雲石特色牆
雲石特色牆能為家居增添優雅知性嘅氣色。近年常見嘅雲石特色牆款色主要為灰白、淡粉、淡啡，加上光滑表面為家居增添奢華感，既柔和又唔失氣派。
3. 玻璃特色牆
玻璃作為感覺通透嘅物料，除咗令家居設計簡潔。玻璃牆設計更會引進自然光，令所有房間更明亮開揚，視覺上大大增加成屋嘅空間感，令家居變得更寬敞。若果想屋企睇落更大，玻璃牆會係您嘅不二之選。
4. 木紋條特色牆
想有日系溫暖感覺，可以選用以木材材料為牆身打造溫暖家居環境。如果想睇落更有風格，可以考慮選用木紋條特色牆，既富有特色又簡約。
5. 拼貼特色牆
若覺得牆身只得一隻色太單調，拼貼特色牆就最適合熱愛型格氣息嘅您。 想凸顯屋主個性，您更可以選用不規則嘅拼貼特色牆。
6. 藝術批盪
普通髹油可能滿足唔到想成個空間更有風格嘅您，可以考慮近年大熱嘅藝術批盪特色牆，喺牆身造出各種立體花紋，屬於特殊髹油一類。油漆師傅只要接受基本訓練 (通常由油漆品牌提供)，並配合特別工具，好快上手，一般人想DIY亦可以。
總結
當您考慮用邊種特色牆裝飾牆身時，要考慮您想要做到嘅效果同保養工作。如果您想要成間屋有煥然一新嘅感覺，您可以向專業嘅裝修師傅介紹最啱您嘅需要同配合屋企設計嘅特色牆。