家居突如奇來嘅問題總係會殺人一個措手不及，而最尷尬嘅事莫過於半夜馬桶塞咗又搵唔到師傅整。到底有咩原因會導致馬桶堵塞？喺搵唔到師傅而屋企又冇廁所泵嘅情況下可以點樣做？只要了解屋企馬桶堵塞嘅原因，記低以下幾個DIY通渠小技巧，即使冇廁所泵或專業通渠知識都可以做到！
1. 水管內有淤塞物
最常遇到嘅馬桶塞咗原因就係異物堵塞。有可能係因為一次過將大量嘅異物倒入馬桶造成堵塞，亦有可能長期將唔應該嘅異物掉落馬桶，例如衛生巾、食物殘渣、非水溶性紙巾、棉花、頭髮等等，即使呢類異物好細小，日積月累下都會造成堵塞。所以當毛髮、異物卡住喺S型彎管時，一沖水，紙巾同排泄物喺進入S管彎時會被勾住，造成堵塞。 當您發現馬桶喺沖水時會慢慢滿上嚟之後再消退，表示馬桶內嘅水管彎位可能有異物塞住。
2. 唔正確地安裝馬桶
如果喺裝馬桶嘅時候，安裝師傅唔夠細心，令到排水管長度同斜度嘅比例出現問題，就會影響到排泄物唔能夠順利完全排出。隨住時間，管線會慢慢開始有污垢堆積，令沖水越來越唔順暢，最後導致堵塞。解決辦法只可以搵專業嘅渠務師傅重新修改水管長度同斜度嘅比例，亦有機會要將馬桶換個位置放。
3. 化糞池出現問題
樓宇排放排泄物嘅管會通去化糞池，當化糞池滿咗，就會出現馬桶堵塞嘅問題。但呢啲情況只係會出現喺舊式建築物或者冇做任何污水工程嘅屋企先會出現。所以遇到呢個問題就好難自己解決，呢個時候就要搵相關公司請水肥車，將裡面嘅排泄物吸出嚟，先可以保持管道暢通。
廁所塞咗又無廁所泵點算好？
其實如果只係第一點，自己都可以嘗試處理㗎！以下就等小編教教大家應該點樣簡易處理馬桶塞咗嘅問題啦！即使半夜搵唔到師傅，又冇專業工具都唔洗怕！
1.洗潔精
在塞咗嘅廁所馬桶擠入大約半杯液體洗潔精，減低溶液表面張力同淤塞物對水渠嘅黏附性，靜待20分鐘，然後反覆沖廁，將淤塞物沖走。
2. 自製通渠蛇
將鐵線衣架扭開，改裝成一條長型鐵鈎，嘗試將鐵鈎到達座廁淤塞處，然後進行「推、扭、拉」動作，有助鬆動及衝走渠內淤塞物。
3.倒入滾水
小心地將4-5杯熱水 (非沸騰狀態)，倒入馬桶碗中，靜待數分鐘。熱水有助分解淤塞物，令佢更容易沖走。
4.倒入大量水幫助沖廁
將廁所馬桶快速倒入3公升水，依靠倒水時嘅衝力，將渠內淤塞物一併沖走。
總結
其實好多人平時都習慣直接沖水，但沒諗到掉落馬桶嘅雜物，隨時就係造成馬桶堵塞嘅致命原因。最好嘅解決方式就係養成良好習慣，唔好亂掉雜物落馬桶。如果以上DIY方法都冇辦法通渠，最好聯繫專業嘅持牌通渠師傅幫您，以避免損壞廁所管道。