講到新居入伙必備，五金工具箱同急救箱一樣重要！平時屋企嘅家居小問題，好似漏水、螺絲鬆咗、砌傢俬等等，都會自己落手試睇吓搞唔搞得掂。到底一個平時家用嘅工具箱應該要有啲咩架撐？五金工具咁多款，要準備幾多先夠用呢？小編為大家整合咗以下10樣屋企必備嘅工具畀大家參考！
1.螺絲批
係屋企最常見同最常用到嘅工具之一，無論係擰螺絲、裝電腦、傢俬等都會用到。小編就建議可以入手螺絲批套裝，因為套裝內有唔同大細嘅一字，十字頭規格，可以滿足屋企各種拆卸需求，因應螺絲款式、大細不同，而換上不同批頭。
2. 六角匙
如果遇到嘅是內六角螺絲或六角絲帽（即自行組裝傢俬常見嘅款式），就需要用到六角匙處理安裝同拆卸工作。
3. 捲尺
可以測試物體嘅長、寬、高，尤其喺買傢俬嘅時侯，用捲尺量度尺寸，避免因尺寸錯誤造成嘅退換貨嘅麻煩。
4. 士巴拿
實際用途用嚟拆啲特別嘅螺絲，好似六角形、星形嘅螺絲頭等。
5. 測電筆
用嚟測試電線入面有冇帶電。用試電筆嘅時候，一定要用手觸及試電筆尾端嘅金屬部分，食指頂住電筆嘅筆帽端，拇指和中指、無名指輕輕捏住電筆，將金屬筆尖插入插座孔。
6. 界刀
主要用嚟切割質地較軟嘅物料，好似拆箱或其他膠紙等。界刀有唔同嘅尺寸，具體可以按實際需要而購買。
7. 鉗
可以代替人手，處理比較尖銳同鋒利嘅器具，例如將玻璃碎片由牆縫夾出，防止手被割損。鉗嘅種類亦都非常多，比如鋼絲鉗，尖嘴鉗，斜嘴鉗、圓嘴鉗等等。當要扭電線，或夾啲好尖嘅物品時就用得到老虎鉗、尖頭鉗，雖然用嘅機會較少，但佢嘅功能較難用其他工具取代。
8. 羊角鎚
平頭嗰邊主要用嚟裝釘，而Y 形頭就專門用黎拆釘。安士愈大嘅槌，發力能力就愈好，如果只係平時放係屋企看門口，8oz就好足夠。用嘅時候記住要小心，千祈唔好砸到手。
9. WD40
無論係門窗發出吱吱聲、拉開鐵閘時有刺耳聲，屋企一定要有支WD40幫您順一順佢。噴一噴，立即解決問題。
10. 電線膠紙
電線膠紙只要圍住痴喺小破損嘅電線/銅線，令佢絕緣，避免電線短路，保護接點，簡單易用。
