浴室嘅排水口經常因為頭髮同洗頭水積聚而造成淤塞。當沖涼時，頭髮同沖涼用品會積聚喺排水位，令排水位去水慢，最終可能會完全阻塞排水口，甚至發出異味。如果只係遇上輕微淤塞，其實靠自己都可以輕鬆處理。我哋為您整理咗以下3個簡單方法幫您解決浴室去水慢嘅問題，唔洗每次搵師傅！
1. 使用頭髮收集器
頭髮收集器可以有效地阻隔頭髮進入排水口。呢啲收集器非常經濟實惠，容易於浴室安裝之餘，沖完涼仲可以輕鬆地將頭髮清除，非常有效解決去水慢問題。
2. 梳打粉加醋
如果用咗頭髮收集器都仲係出現去水慢嘅問題，咁就可以試用化學嘅方式解決。將蘇打粉同醋混合，並倒進排水口。等待15分鐘，然後倒入滾水。利用酸鹼中和的化學反應有助分解排水口內嘅頭髮同異物，幫助您更容易將佢哋沖走。
3. 利用廁所通渠泵或排水通渠蛇
將廁所通渠泵放喺排水口上面，用力上下抽動，直到產生良好吸力將排水位內嘅異物沖走。或者可以用排水通渠蛇直由浴缸、或沖涼排水位中嘅堵塞物拉出嚟，一分鐘搞掂淤塞煩惱，亦唔需要管道專業知識就解決去水慢問題。
總結
通過定期清潔同檢查，一般可以大大減少或防止到浴室排水慢嘅問題。無論係頭髮收集器、化學處理、利用簡單通渠工具都可以輕鬆幫助您解決排水位淤塞。保持浴室排水口清潔暢通除咗可以防止排水位老化同淤塞，仲可以減少異味同細菌增生。