嚟到落雨季節除咗潮濕問題令人困擾，大批飛蟻入屋相信亦係最令大家頭痛嘅問題。假如處理得唔好，飛蟻更有可能化成白蟻入屋築巢，飛蟻白蟻喺屋企可能會引致好多問題，例如損壞傢俬同建築結構，後果真係不堪設想！有見及此，小編為大家三招必殺技預防飛蟻入屋，係時候學習防飛蟻、白蟻嘅有效對策！
1. 晚上避免開窗、善用遮光窗簾
飛蟻具趨光性，容易被燈光吸引。所以到晚上，關好窗戶同部分燈光可以避免吸引飛蟻大舉入侵您屋企。另外，採用遮光功能強嘅窗簾，亦有助防止飛蟻喺您嘅窗戶附近徘徊。
2. 保持屋企環境乾爽
飛蟻白蟻鍾意潮濕嘅環境，所以要確保屋企四周都保持乾爽。可以定期檢查水管有冇漏水，同埋清潔冇用嘅積水，需要時每日可以使用抽濕機保持空間乾爽。另外，可以喺潮濕嘅地方放啲除濕劑，幫助吸收多餘嘅水分。對飛蟻而言，潮濕陰暗嘅浴室角落、洗手盤下嘅收納櫃、廚房、 囤積嘅紙箱、雜物等，都是繁殖好地方。而木製家品，為佢哋提供食糧。喺潮濕天氣利用抽濕機、風扇、冷氣等除濕，係其中一個最有效預防飛蟻同白蟻嘅方法。
3. 阻止蟲蟻入侵
喺屋企嘅門窗裝蚊網，亦可以有效阻止飛蟻入屋。另外，我哋建議大家應該定期檢查屋企嘅縫隙同窗隙，尤其喺牆壁、地板同天花板嘅交界處。如果發現縫隙，可以用密封劑將佢封住以防止蟲蟻從裂縫鑽入。
白蟻築巢的幾個跡象
如果屋企真係不幸遇到白蟻入侵，處理上需要更小心謹慎。白蟻嘅破壞力驚人， 除了侵蝕木材之外，亦會分泌出蟻酸，腐蝕鋼筋水泥。及早發現先可以有效阻止情況進一步惡化。以下係幾個白蟻已經入侵屋企嘅幾個明顯跡象。
1. 在牆壁或角落上發現蟻道
由於白蟻怕光，佢哋會往返蟻巢路上，留低分泌物建造出一條條「蟻路」，以避免活動時受陽光照射。蟻道通常出現喺牆壁或角落上，如果喺屋企發現線狀蟻路，代表白蟻很有可能已經喺您屋企築起蟻巢。
2. 敲打木製傢俬、牆壁時聲音有空心嘅感覺
白蟻以木製品等為主要食物，佢哋會蛀蝕木柱、門框、地板同木製傢俬內部。所以，當您輕敲以上地方時，敲擊聲音有空心感覺，甚至有凹陷情況，代表內部已被白蟻入侵。
3. 地上出現飛蟻翅膀
飛蟻其實就係正值交配期嘅白蟻。當佢哋去到適合繁殖嘅目的地後，就會脫翼，開始築巢。所以如果喺地下發現飛蟻翼，但又睇唔到隻蟻，有可能飛蟻已經變化成白蟻，潛入屋企。
總結
跟住以上3招必殺技，您就可以有效預防飛蟻白蟻入屋。同時，定期檢查屋企嘅環境，發現有蟲蟻問題就要即刻處理，保持家居安全同衛生。