香港溫度持續攀升，呢種高溫對於生活喺劣質房屋環境嘅市民影響更為嚴重，佢哋即使喺室內，炎熱嘅氣溫令佢哋難以喘息。香港最近幾星期已經連續出現創紀錄嘅高溫，溫度持續保持喺攝氏35度再加埋過80%嘅空氣濕度，以至本港曾多次發出酷熱天氣警告。
最近颱風瑪娃帶黎嘅熱浪令好多香港市民叫苦連天，尤其係好多低收入家庭同長者，好多都係居住喺劏房或臨時房屋，呢啲臨時房屋未必設有冷氣，只能靠電風扇通風，受高溫影響下單位形同焗爐。有啲家庭即使屋企有安裝冷氣，但未必負擔得起高昂嘅冷氣費用，好多時佢哋要流連商場消暑。
另外，長者喺高溫下更會面臨更多健康問題。香港大學研究報告^曾經提到，酷熱天氣除咗可直接導致長者熱衰竭及中暑，亦會引發頭暈、頭痛、脫水、認知功能下降、心情煩躁及失眠等徵狀，嚴重的話更可誘發心血管病，絕對不容忽視。長者由於身體機能下降，加上部分患有慢性疾病嘅長者須服用某些藥物，會較易受酷熱天氣影響。
即使政府呼籲市民盡量留喺室內並補充足夠水分，但對於冇冷氣或居住條件惡劣嘅市民，呢類建議幾乎冇可能實現。即使香港現有嘅非營利組織會喺極端酷熱天氣警告生效時為需要嘅市民提供臨時避暑庇護所，但設施有限。當酷熱天氣持續幾日以上，好多香港貧困居民只可以繼續留喺屋企忍受炎熱艱苦嘅生活。
由於氣候變化導致極端天氣事件頻率同強度增加，PapaCare希望可以盡力改善香港弱勢群體嘅住屋環境同提升生活水平，並為社區提供所需嘅資源。
^Source： https://nursing.hku.hk/news-and-events/newspaper-articles/adverse-effect-of-hot-weather-on-the-older-population#:~:text=%E9%85%B7%E7%86%B1%E5%A4%A9%E6%B0%A3%E9%99%A4%E4%BA%86%E5%8F%AF%E7%9B%B4%E6%8E%A5,%E6%98%93%E5%8F%97%E9%85%B7%E7%86%B1%E5%A4%A9%E6%B0%A3%E5%BD%B1%E9%9F%BF%E3%80%82